阿信的故事 (阿信的孩子曾被診斷為自閉症，孩子現就讀主流初小)
阿信細個嘅時候就要同父母，哥哥分開，嚟到香港住喺親戚嘅屋企。雖然父母畀咗好多物質嘅供應，但係阿信其實 好想得到屋企人嘅關心同埋照顧。阿信宜家回想，係得到好多人嘅愛錫，同哥哥嘅關係好好，一齊訓一齊沖涼，返到自己屋企係唔捨得走。而父母都好愛錫，不過媽媽就因為一啲原因，對阿信有啲特別: 因為阿信出世嘅時候，一位哥哥就過咗身，佢諗可能係媽媽心裏面介意。後來積咗好耐之後，阿信終於問媽媽，佢自己係唔係剋星。媽媽回答佢 話佢唔係，反而佢係帶旺屋企，呢個回答令到佢心裏面終於覺得安慰。
細個住喺舅父屋企，試過學壞。自己生日，都冇生日蛋糕冇慶祝，表哥表姐就有。凍咗無人俾件衫佢，覺得冰冷，缺乏愛。不過佢又記得，表哥表姐其實都錫佢，會安慰佢鼓勵佢。舅父放工返嚟，都會幫佢冚被，其實都有關心。
因為阿信細個感覺缺乏父母愛，所以下定決心，如果有機會做媽咪的話，就會畀最好嘅關心同埋照顧比自己小朋友。 阿信提起有人錫，就諗起佢先生 ，佢話佢先生係上天派嚟嘅小天使，有節日會為佢慶祝，同佢講好多嘢 ，令佢試一啲以前唔識嘅嘢，變得好開朗，好開心。
阿信爸爸同阿信亦好親密，有次因為同 男朋友 (即係依家嘅先生) 去街，爸爸生日嘅嗰一日，夜晚先打電話返屋企，結果比爸爸鬧，原來爸爸等咗佢打電話返嚟等左成日。阿信自己比較直腸直肚 開心唔開心，都會同人講出嚟，所以同爸爸關係比爸爸和其他哥哥好。
後來同先生拍咗拖8年結婚，開頭唔想生小朋友，因為鍾意同小朋友玩，但係就唔鍾意揍。身邊有親戚揍小朋友揍到好辛苦好激氣。先生亦都尊重佢唔生小朋友。但係後來佢發現，先生同小朋友玩得特別開心，於是佢問先生，個心想唔想有自己嘅小朋友。先生話想。加上屋企人其實經常都喺度問，所以佢就決定生小朋友。其實佢身體唔好，好難先有依個小朋友，結果小朋友出世之後，帶嚟好多唔開心同困擾，因為個仔夜晚唔瞓覺，佢先生都好煩躁，阿信個心會後悔生咗小朋友影響咗同先生嘅關係，但係佢又同時覺得需要照顧好呢個小朋友 ，所以內心都有掙扎，有時好似有兩個人咁，一時會諗點解生咗小朋友搞到夫婦關係唔好，但有時靜落嚟又會諗返，其實小朋友都唔想。成個過程同老公嘅關係起起伏伏，請咗工人姐姐幫忙之後變好，後來試過冇姐姐，關係又再變得唔好，之後去過教會嘅夫婦營，大家可以變番好甜蜜，又學識講讚美嘅說話，係好開心，另外之後又學到 RDI 畀到助力，以前以為鬧同埋打係最快，而家會學識慢落嚟，從阿仔嘅角度諗下。 通常自己阿急同阿該(註:即應該的該)出咗嚟，就會好辛苦同激氣，但若能夠靜落嚟，能夠交託畀神，能夠諗返呀仔嘅角度去出發，諗返阿仔嘅難處，例如: 雖然依家自己 同先生為咗幫阿仔做功課搞到好辛苦好嬲好激氣，但係諗番，大人都可以講到自己有咩唔開心，但係仔仔可能自己都面對住好多野講唔到，例如喺新學校，佢又去搵返一啲以前識落但係又讀緊高一班嘅同學仔去玩，可能佢自己都好多嘢要適應。
阿信佢發現 ，當阿慢能夠出嚟嘅時候，就可以理解到阿仔，就冇咁煩躁 會思考，會觀察，要求冇咁高，心情靚啲，咩都順利啲。若夜晚可以同老公傾下計食下甜品散下步，叉下電，都可以令自己，開心啲。
未來阿信想兩夫婦關係更加好啲，仔慢慢能夠自己獨立。
佢有一個成功既經驗就係，前一日同仔做功課，發現兇佢追佢，急係冇用嘅， 佢同仔講好，自己一邊煮飯仔就一邊做功課，校好鬧鐘，十五分鐘就做下一樣 功課，如果早左做完，就有得休息同玩。佢唔睇住仔仔做功課自己去煮飯效果仲好。同埋完咗之後，同仔仔講可以同表哥一齊落去遊樂場玩，結果真係唔使勞氣，阿仔係多左推動力，同埋自己亦都冇急住一定要洗碗，玩完返嚟先洗 ，又冇話一定要早瞓覺嘅話，真係可以放慢同放鬆，俾多咗空間，能夠體諒 同埋仲可以同老公傾返阿仔嘅開心嘢進步嘢，大家都好開心。
講完自己嘅故事，又聽完其他組員嘅回響之後，阿信發現自己唔係一個人去行，可以聽返其他人嘅經驗，可以行新嘅路。
