I女士的故事

I女士的故事 (I女士的孩子被診斷為自閉症，孩子現就讀主流高小)

以前
以前 I女士把全副精神放在阿仔身上，有七八年時間，甚至更長，自己的需要沒有理會，更連老公的需要也沒有理會。由發現阿仔有問題開始，就不斷搵 ，不斷試，完全唔發覺自己過曬火，只覺得別人唔明白自己。人哋話自己好crazy都唔理，當時唔識得錫自己和身邊任何人。

期間返過四間教會，始終都搵唔到自己心目中認為應有的愛能接納包容，想人地能夠明白阿仔同埋自己，又可幫助呀仔同其他人相處，覺得阿仔成長唔到咁就離開，最後，神帶佢嚟現在嘅教會。

現在
最近阿仔有一啲行為問題，令一位小朋友感覺被傷害，以致阿仔再唔能夠獨立返兒童團契。呢件事令I女士感到好傷心，因為阿仔唔係特登去做，而係因為佢嘅障礙先會咁，但係阿仔同埋自己嘅需要就不被理解，感覺好惆悵，唔知點算，疑惑，好感嘆，好傷心，點樣先可以搵到包容接納的愛？喺教會仍未能得到理解，自己仍要去事奉，但係I女士 其實好想佢哋能明白佢的感受和仔得到包容接纳，同心令自己和仔仔成長。

I女士認為而家最需要係心靈醫生，即係神嘅帶領，因為人嘅能力好有限，但係神就不同，能夠解決一切問題。

原來I女士 感受到包容接納的愛係非常重要，能改善彼此關係也穩定情緒，是人最需要的，原因係學咗RDI呢啲方法。另外，係因為有神包容接納同埋愛I女士。以前嘅I女士 認為自己驕傲，冇包容，同其他人疏離。但係認識神之後，就非常觸動I女士內心，令佢有憐憫心，會從對方角度看事物，所以呢位心靈醫生，係唯一能夠安慰到 I女士嘅。呢位醫生，好溫柔好了解佢需要，令I女士 好舒服，又體貼又明白佢，安慰到佢，令I女士覺得冇有怕，就好似一條救命繩咁， I女士 可以捉緊呢條救命繩之後，咁樣，其他嘢都變得好閒，冇所謂嘞。佢亦都係 I女士生命入面嘅源頭，讓佢睇到好多好靚嘅嘢，係以前睇唔到嘅。

另外 I女士亦都在阿仔身上學識包容接納同埋愛，會令人好開心。

所以面對教會和其他人既不理解，I女士都免得講太多嘢，佢會等候，同埋自己做好自己先，咁樣人哋睇到，亦都會受感染。佢亦學習去包容接納愛呢d未婚或沒孩子並唔太了解孩子和特殊需要小孩的姐妹。

以前教會入面其實都有一位姊妹好欣賞I女士 ，認為佢係一個好人，係善良嘅人，經常邀請I女士分享自己嘅經歷希望幫到人，都讓I女士感到有支持。

未來
I女士話， 呢個傷係成長嘅傷。佢望見嘅將來，想可以同阿仔一齊在教會服侍，成為別人嘅祝福，活出愛。

總結
I女士 話，神係佢嘅父親，只要將所有事交俾主，就有依靠，自己可以輕省。

同埋，人生就好似過山車，總會有上有落帶驚又帶喜，不會平坦易過，但過左之後就會感覺甜在心。

而講完自己嘅故事，聽到其他人嘅迴響，I女士發現原來每個人嘅故事都係一個見證，可以安慰同埋鼓舞別人，佢覺得好開心，當中有好多恩典。也覺得其他人形容自己非常貼切感到—切都美好。